Ég er alveg búin að fá nóg! Þessi vika hefur verið ótrúlega erfið og ég þarf á almennilegri afslöppun að halda í kvöld. Upphaflega planið var að við Jóa myndum slá okkur upp í kvöld og heimsækja næturlífið í stórborginni Reykjavík. Það lítur hins vegar út fyrir að það muni ekkert gerast. Jóa virðist hafa gleymt að taka geðlyfin sín í gær og skemmst er frá því að segja að við erum ekki vinkonur. A.m.k. ekki í dag. Ég veit ekki almennilega hvað gerðist; eina stundina var ég að tala við hana í síma um tilvonandi skemmtun okkar og þá næstu flugu fúkyrði og harðorðaðar yfirlýsingar á báða bóga. Á endanum bað ég hana vel að lifa og skellti á hana þar sem hún var í miðri setningu að minna mig á hvar ég mætti stinga "viðbjóðslega prjónadraslinu" mínu. O jæja - þessi vinskapur var nú frekar brothættur til að byrja með. Það sem er verra er að nú á ég ekki í nein hús að vernda! Jú ég hef auðvitað heimili mitt og get skemmt mér við það að annað hvort hanga inni í herbergi eða eldhúsi allt kvöldið eða fylgjast með laugardagskvöld-skemmtuninni á Omega með frænkunum. Ég reyndi að stinga upp á því við þær að við prófuðum að fylgjast með Eurovision undankeppninni í staðinn - svona einu sinni - en keppnin ku vera "óguðleg" og "ósmekkleg" og "ekki sannkristnu fólki sæmandi." Ég sá því ekki marga kosti í stöðunni og í hálfgerðri örvæntingu játaðist ég heimboð Hermanns nokkurs sem gestir síðunnar kannst kannski við. Ég hef blendnar tilfinninar til mannsins og þeirrar skemmtunar sem ég á í von á í kvöld en ég verð með lítra af vodka í farteskinu og fæ í öllu falli að upplifa Eurovisionstemninguna!
Fúlhildur hefur orðið
Ævi, störf og daglegt líf skáldkonunnar
laugardagur, febrúar 15, 2003
þriðjudagur, febrúar 11, 2003
mánudagur, febrúar 10, 2003
Aumingja kisurnar mínar hafa verðir gerðar útlægar! Halldóra er með ofnæmi og krafðist þess að Kirka og Medea yrðu geymdar eingöngu inni í geymslu þar sem þeim yrði hleypt inn og út um gluggann! Bruggafgangarnir mínir sem ég var að treina mér hurfu á tveimur dögum svo og afgangurinn af jólasmákökunum. Stofan mín lítur út eins og búningsherbergi í K-Mart og ég hef verið neydd til að horfa á Omega og bara Omega öll kvöld síðan þær komu!
Einnig hef ég neyðst til að hætta framleiðslu á prjónuðu pungbindunum (KlofKeli2003TM) tímabundið eftir að þær komust yfir eitt hálfklárað með hjörtum (tilraunaeintak) og fóru að nota orðin "prjónar" og "verkfæri Satans" í sömu setningu. Ég hef brugðið á það ráð að eyða öllum mínum stundum heima hjá Jóu þar sem alltaf er boðið upp á róandi gin og greip. Ég kíki heim til að sofa og sinna köttunum en reyni þess á milli að forðast staðinn. Ég veit hreinlega ekki hvað ég á til bragðs að taka!
Ætli Dóra tæki eftir því ef ég setti kattarhár inni í svefngrímuna hennar?